Home Tamil Cinema News காட்சிகளை வெட்ட சினிமா தணிக்கை வாரியத்திற்கு அதிகாரம் இல்லை என்று மும்பை ஐகோர்ட் கருத்து

காட்சிகளை வெட்ட சினிமா தணிக்கை வாரியத்திற்கு அதிகாரம் இல்லை என்று மும்பை ஐகோர்ட் கருத்து

123

udta-punjab

இந்தி நடிகர் ஷாகித் கபூர் கதாநாயகனாக நடிக்கும் படம் ‘உத்தா பஞ்சாப்’. இந்த படத்தில் ஆலியா பட், கரீனா கபூர் ஆகியோர் கதாநாயகிகளாக நடித்து உள்ளனர். போதைப்பொருட்கள் பற்றிய விழிப்புணர்வை கருப்பொருளாக கொண்ட இந்த படத்தை அபிஷேக் சவுபே இயக்கத்தில் அனுராக் காஷ்யப் உள்ளிட்டோர் தயாரித்து உள்ளனர். இந்த படம் 17-ந் தேதி திரைக்கு வரும் என்று அறிவிக்கப்பட்டது.

இதனிடையே, உத்தா பஞ்சாப் படத்தை தணிக்கை செய்த சினிமா தணிக்கை குழு, அதில் சில காட்சிகள் ஆட்சேபனைக்கு உரியதாக இருப்பதாக கூறி நீக்கியது. மேலும், 13 இடங்களில் மாற்றம் செய்யுமாறு பரிந்துரை அளித்தது. அத்துடன் படத்தின் தலைப்பில் ‘பஞ்சாப்’ பெயர் இடம்பெறுவதற்கும் கண்டனம் தெரிவித்தது.

இதற்கு படக் குழுவினர் எதிர்ப்பு தெரிவித்து மும்பை ஐகோர்ட்டை அணுகினர். அப்போது, தணிக்கை குழுவுக்கு எதிராக கடுமையான விமர்சனத்தை நீதிமன்றம் முன் வைத்தது படக் குழு.

இதனிடையே சர்ச்சைக்குரிய உத்தா பஞ்சாப் திரைப்படத்தை வெளியிட சினிமா தணிக்கை குழு அனுமதி அளித்துள்ளது. படத்திற்கு சினிமா தணிக்கை குழு ‘ஏ’ சான்றிதழ் வழங்கியுள்ளது. சர்ச்சைக்குரிய 13 காட்சிகளை நீக்கியதால் அனுமதி அளித்துள்ளதாக சினிமா தணிக்கை குழு தெரிவித்துள்ளது.

இந்த நிலையில், உத்தா பஞ்சாப் பட விவகாரம் தொடர்பான விசாரணை மும்பை ஐகோர்ட்டில் இன்று நடைபெற்றது. அப்போது, நீதிபதிகள் கூறியதாவது,

போதைப் பொருள் பயன்பாட்டை ஊக்கப்படுத்தும் வகையில் ஏதேனும் இருக்கிறதா என்று அறிய படத்தின் கதை வசனம் முழுவதையும் படித்தோம். உத்தா பஞ்சாப் படத்தில் இந்திய இறையாண்மை அல்லது ஒருமைப்பாட்டிற்கு எதிராக எதுவும் இல்லை.

திரைப்பட தணிக்கை வாரியம் சட்டத்தின் படியும், சுப்ரீம் கோர்ட் வழிகாட்டுதலின் படியும் நடக்க வேண்டும். திரைப்படத்தின் கதையை முடிவு செய்ய வேண்டியவர்கள் இயக்குனர்கள் தான்.

படைப்பின் கருத்து தவறாக இல்லாத பட்சத்தில் அதில் தலையிட யாருக்கும் உரிமை இல்லை. காட்சிகளை வெட்டவோ நீக்கவோ தணிக்கை வாரியத்திற்கு அதிகாரம் இல்லை. இவ்வாறு தெரிவித்தனர்.

இத்தீர்ப்பு குறித்து தணிக்கை வாரியத் தலைவர் நிஹலானி கூறும்போது: இனிமேல் தணிக்கை வாரியம் பரிந்துரைக்கும் ஒவ்வொரு வெட்டுக்கும் நீதிமன்றத்தை படத்தயாரிப்பாளர்கள் அணுகுவார்கள். இந்தத் தீர்ப்பு தயாரிப்பாளர்களுக்கு மிகவும் நல்லதாகும். ஏனெனில் நானும் தயாரிப்பாளராக இருந்தவன். நான் சட்டப்படியே என் பணிகளைச் செய்தேன்.

ஆனால் இன்றுமுதல் தயாரிப்பாளர்களால் நினைத்ததைப் படமாக்கும் சுதந்தரம் வந்துள்ளது. விரசமான, மோசமான காட்சிகளைப் படத்தில் இடம்பெறவைக்க அவர்களுக்குச் சுதந்தரம் கிடைத்துள்ளது. இந்தச் சுதந்தரமான காலகட்டத்தில் அவர்கள் எப்படி படம் எடுத்தாலும் ஏ சான்றிதழுடன் படம் வெளியாக அனுமதி கிடைக்கும் என்று கூறியுள்ளார்.